14November 14
Readings of the day
Бра́тие, о да бы́сте ма́ло потерпе́ли безу́мию моему́! Но и потерпи́те мя. Ревну́ю бо о вас Бо́жиею ре́вностию: обручи́х бо вас еди́ному му́жу, де́ву чи́сту предста́вити Христо́ви. Бою́ся же, да не ка́ко, я́коже змия́ Е́ву прельсти́ лука́вством свои́м, та́ко истле́ют и ра́зумы ва́ша от простоты́, я́же о Христе́. А́ще бо гряды́й и́наго Иису́са пропове́дает, его́же не пропове́дахом, или́ Ду́ха ина́го прие́млете, его́же не прия́сте, или́ благовествова́ние и́но, е́же не прия́сте, до́бре бы́сте потерпе́ли. Непщу́ю бо ничи́мже лиши́тися пре́дних Апо́стол. А́ще бо и неве́жда сло́вом, но не ра́зумом, но везде́ я́вльшеся о всем в вас.
Во вре́мя о́но, созва́ Иису́с обана́десяте ученика́ Своя́, даде́ им си́лу и власть на вся бе́сы, и неду́ги цели́ти, и посла́ их пропове́дати Ца́рствие Бо́жие и исцели́ти боля́щия. И рече́ к ним: ничесо́же возьми́те на путь, ни жезла́, ни пи́ры, ни хле́ба, ни сребра́, ни по двема́ ри́зама име́ти. И во́ньже дом вни́дете, ту пребыва́йте, и отту́ду исходи́те. И ели́цы а́ще не прие́млют вас, исходя́ще от гра́да того́, и прах от ног ва́ших оттряси́те, во свиде́тельство на ня. Исходя́ще же прохожда́ху сквозе́ ве́си, благовеству́юще и исцеля́юще всю́ду.
Бра́тие, Бог ны посла́нники после́дния яви́, я́ко насме́ртники, зане́ позо́р бы́хом ми́ру и А́нгелом и челове́ком. Мы у́бо бу́и Христа́ ра́ди, вы же му́дри о Христе́, мы не́мощни, вы же кре́пцы, вы сла́вни, мы же безче́стни. До ны́нешняго часа́ и а́лчем, и жа́ждем, и наготу́ем, и стра́ждем, и скита́емся, и тружда́емся, де́лающе свои́ми рука́ми. Укоря́еми, благословля́ем, гони́ми, терпи́м, ху́лими, утеша́емся, я́коже отре́би ми́ру бы́хом, всем попра́ние досе́ле. Не срамля́я вас сия́ пишу́, но я́коже ча́да моя́ возлю́бленная наказу́ю. А́ще бо и мно́ги пе́стуны и́мате о Христе́, но не мно́ги отцы́, о Христе́ бо Иису́се благовествова́нием аз вы роди́х. Молю́ же вас: подо́бни мне быва́йте, я́коже аз Христу́.
Во вре́мя о́но, восхоте́ Иису́с изы́ти в Галиле́ю, и обре́те Фили́ппа и глаго́ла ему́: гряди́ по Мне. Бе же Фили́пп от Вифсаи́ды, от гра́да Андре́ова и Петро́ва. Обре́те Фили́пп Нафана́ила и глаго́ла ему́: Его́же писа́ Моисе́й в зако́не и проро́цы, обрето́хом Иису́са сы́на Ио́сифова, и́же от Назаре́та. И глаго́ла ему́ Нафана́ил: от Назаре́та мо́жет ли что добро́ бы́ти? Глаго́ла ему́ Фили́пп: прииди́ и виждь. Ви́де же Иису́с Нафана́ила гряду́ща к Себе́ и глаго́ла о нем: се вои́стинну Изра́ильтянин, в не́мже льсти несть. Глаго́ла Ему́ Нафана́ил: ка́ко мя зна́еши? Отвеща́ Иису́с и рече́ ему́: пре́жде да́же не возгласи́ тебе́ Фили́пп, су́ща под смоко́вницею ви́дех тя. Отвеща́ Нафана́ил и глаго́ла Ему́: Равви́, Ты еси́ Сын Бо́жий, Ты еси́ Царь Изра́илев. Отвеща́ Иису́с и рече́ ему́: зане́ Рех ти, я́ко ви́дех тя под смоко́вницею, ве́руеши, бо́льша сих у́зриши. И глаго́ла ему́: ами́нь, ами́нь глаго́лю вам, отсе́ле у́зрите не́бо отве́рсто и А́нгелы Бо́жия восходя́ща и нисходя́ща над Сы́на Челове́ческаго.
Hymns
Благоукраша́ется вселе́нная,
Ефио́пия ликовству́ет,
я́ко венце́м красу́ема,
тобо́ю просвети́вшися,
све́тло торжеству́ет па́мять твою́,
Богоглаго́ливе Фили́ппе,
вся бо ве́ровати Христу́ научи́л еси́
и тече́ние соверши́л досто́йно Ева́нгелия.
Тем дерзнове́нно вари́т Ефио́пская рука́ к Бо́гу,
Его́же моли́ дарова́ти нам ве́лию ми́лость.
Струю́ сло́ва пода́ждь ми, Го́споди,
водно́е естество́ соде́явый,
се́рдце мое́ укрепи́, Благоутро́бне,
и́же зе́млю утверди́вый сло́вом Твои́м,
и просвети́ мое́ помышле́ние,
све́том, я́ко ри́зою, одева́яйся,
да глаго́лю и пою́ подоба́ющая
и досто́йно восхвалю́ Твоего́ уго́дника, Многоми́лостиве.
Правосла́вию наста́вниче, святи́телем украше́ние,
Богосло́вцем побо́рниче непобеди́мый, Григо́рие чудотво́рче,
Солу́ню вели́кая похвало́, пропове́дниче благода́ти,
моли́ Христа́ Бога спасти́ся душа́м на́шим.
А́нгел яви́лся еси́ на земли́, неизрече́нных Боже́ственная тле́нным возвеща́я,
и́бо Безпло́тных гласово́м, челове́ческим же умо́м и те́лом живы́й, удиви́л еси́
и сотвори́л еси́ зва́ти ти, Богоглаго́ливе, сия́:
ра́дуйся, его́же ра́ди Свет пропове́дася;
ра́дуйся, Его́же ра́ди тьма отгна́ся;
ра́дуйся, Несо́зданнаго Божества́ возвести́телю;
ра́дуйся, со́зданнаго естества́ и бу́яго вои́стину обличи́телю;
ра́дуйся, высото́ невосхо́дная, Бо́жие естество́ рек;
ра́дуйся, глубино́ неудо́бь зри́тельная, де́йство рек;
ра́дуйся, я́ко сла́ву Бо́жию до́бре рекл еси́;
ра́дуйся, я́ко мудрова́ния зло́бных отре́к;
ра́дуйся, свети́ло, показа́вый со́лнце; ра́дуйся, сосу́де, Боже́ственнаго пития́ прия́телище;
ра́дуйся, и́мже и́стина сия́ет:
ра́дуйся, и́мже помрачи́ся лжа;
ра́дуйся, пропове́дниче благода́ти.
Я́ко кедр, в пусты́ни дави́дски расту́щ, и я́ко фи́никс, благоуха́нен цвету́щ,
ревни́тель учи́телю твоему́ был еси́, преподо́бному отцу́ Корни́лию,
стопа́м бо его́ после́довал еси́
и, свято́е и́го взем,
све́тлым житие́м просия́л еси́, я́ко со́лнце,
я́влься ми́рови мно́гими чудесы́, о́тче Фили́ппе!
И ны́не на Небесе́х предстои́ши Престо́лу Пресвяты́я Тро́ицы
и, я́ко вели́кое име́я дерзнове́ние,
преподо́бнии свои́ ру́це возде́в,
моли́ от враг сохрани́тися градо́м на́шим и спасти́ся душа́м на́шим.
Воспое́м ны́не преди́внаго в чудесе́х,
возсия́вшаго во о́бласти Белао́зера, просия́вшаго, я́ко со́лнце.
О неистощи́мый исто́чниче чуде́с, свя́тче Бо́жий Фили́ппе!
всегда́ Святе́й Тро́ице предстоя́
и моле́нием предваря́я за страну́ на́шу и о всем ми́ре,
не забу́ди и нас, твои́х раб,
призыва́ющих тя моле́бным пе́нием,
честну́ю па́мять твою́ творя́щих,
помоли́ся о нас ко Го́споду во святы́х свои́х моли́твах,
да спасе́т ду́ши на́ша.
Menologion
Апостола Филиппа (I)*.
Прп. Филиппа Ира́пского (1537‒1539). Правоверного царя Иустиниа́на (565) и царицы Феодоры (548). Свт. Григория Паламы́, архиеп. Фессалонитского (1357).
Сщмчч. Димитрия Беневоленского, Александра Быкова, Виктора Ильинского, Алексия Нечаева, Михаила Белюстина, Михаила Некрасова, Феодора Баккалинского, Петра Титова, Алексия Никологорского, Сергия Знаменского, Николая Дунаева, Василия Лихарева, Александра Покровского, Николая Виноградова, Димитрия Лебедева, Порфирия Колосовского, Василия Никольского, Георгия Извекова, Василия Розанова, Сергия Спасского, Александра Чекалова, Сергия Руфицкого пресвитеров, Николая Богородского диакона, прмч. Аристарха Заглодина-Кокорева, мчч. Гавриила Безфамильного, Димитрия Рудакова, мц. Анны Зерцаловой (1937); сщмч. Феодора Грудакова пресвитера (1940); cщмч. Сергия Константинова пресвитера (1941).
* В день памяти апостола Филиппа, 14 ноября 1263 года, преставился св. блгв. вел. кн. Александр Невский (см. Сергий (Спасский), архиеп. Полный месяцеслов Востока. Владимир, 1901. М. 1997р. Т. 2. С. 355).